Drukkoker Chinese Wildsrepies

Die volgende resep is perfek vir besige weeksdae - vinnig en maklik!

My huishouding floreer op wildsvleis as 'n stapelvoedsel. Dit het my geleer om resepte aan te pas vir wildsvleis, soos hierdie Chinese wildsrepies wat in 'n drukkoker gemaak word. Die oorspronklike beesvleisresep kom van die Six Sister's Stuff blog en ek het dit aangepas om by my man se liefde vir wildsvleis aan te pas. Deesdae is my weergawe 'n gunsteling by ons eetkamertafel.

Vir hierdie resep in die drukkoker, is dit beter om 'n taaier snit vleis te gebruik. Vermy sagte steak en rugstring, maar flank of stowevleis sal werk. Die sojasous gee 'n heerlike geur aan die vleis en die drukkoker maak enige snit murgsag.

Ek het hierdie resep al met takbok, kudu en sebra gemaak, maar enige tipe rooi wildsvleis sal ook goed werk!

Hoe om Drukkoker Chinese Wildsrepies te maak

Bestanddele

• 1 kg wildsvleis, in repies gesny

• 1 eetlepel olie

• 2 knoffelhuisies

• 1/2 koppie sojasous

• 1/2 koppie water

• 1/2 koppie suiker (bruinsuiker werk die beste, maar witsuiker is ook lekker. Ek het selfs al Xylitol gebruik)

• 1/2 teelepel vars gemmer

• 2 eetlepels Maizena

• 5 eetlepels water

• sesamsade (opsioneel)

Instruksies

1. Berei al jou bestanddele voor - sny die vleis in repies omtrent so groot soos jou duim of effens groter, maal die knoffelhuisies en gemmer, meng die sojasous, water en suiker in 'n maatbeker. Omdat hierdie resep so vinnig is, vind ek dit behulpsaam om eers al my bestanddele bymekaar te kry.

2. Skakel jou drukkoker aan en gebruik die SAUTE funksie. Sit die olie in die pot en laat verhit tot warm.

3. Sodra die olie warm is, begin jou vleis bietjie-bietjie verbruin. Moenie te veel vleis op een slag in die pot sit nie, anders sal dit nie lekker bruin word nie. Hou verbruinde vleis eenkant tot al die vleis verbruin is.

4. Braai knoffel en gemmer vir 'n minuut in die pot. Wees versigtig dat die knoffel nie brand nie!

5. Sit die vleis terug in die pot en gooi sojasous, suiker, en water by.

6. Sit die deksel op die drukkoker en laat PRESSURE COOK teen hoë druk vir 11 minute. Indien jou vleis groter repies is, voel vry om die vleis langer te kook - ek het al in die verlede vir so lank as 18 minute gekook.

7. Opsioneel: terwyl die vleis kook, braai 'n paar knippies sesamsade in 'n pan oor medium hitte.

8. Wanneer die vleis klaar gekook is, maak die stoomknop oop om die druk in die pot te verlig.

9. Sodra die stoom uit is, meng die Maizena met water en gooi die mengsel by die vleis.

10. Laat die sous vir 'n paar minute kook om dik te word.

11. Bedien saam met rys of noedels. Strooi die opsionele sesamsade oor die vleis vir ekstra geur.

    
    

Notas

• Bêre enige oorskiet in lugdigte houers in die yskas vir 3 dae.

• Indien jy hierdie dis vooruit wil maak, kan jy die vleis, sojasous, water, gemmer en knoffel als saam in 'n herseelbare houer of sakkie vries. Sit dan al die gevriesde bestanddele saam met 'n halwe koppie water in die drukkoker en kook vir 25 minute teen hoë druk. Volg dan die res van die stappe soos hierbo.

• Die resep kan ook in die "slow cooker" gemaak word - kook net die vleis vir 2 ure op hoë hitte of 4 ure op lae hitte!